Oh kläna Engel ( Ruth Ankele )

Oh kläna Engel

von Ruth Ankele

Foto: Ruth Ankele

Oh kläna Engel

du ama Deiwel……………..
da erschd Advent is do.
Jetzt get et rund, datt wirschd de wissen, et is nit onnaschd , wie im Johr davor.
Bis om 24. Owens , wirschde jetzt schdrabaziert,
donn iwwahollt et Krischkinnjen,
un de wirschd bis näckscht Johr nomoll ausrangiert.
Awwa die 4 Wuchen bis dohin, do muschde jetzt ran
, un käna froht sich, ob der Klän datt ach kann.

Oh kläna Engel, ama Deiwel du

Jetzt losst kän Mensch dich meh in Ruh.

Wo et gonz Johr kän Geheichnis hat genn
Wo jeder nur vor sich gelebt hatt un hod meischdens die Flemm,
do sollsch de jetzt besinnliche Stimmung vabreiten
sollschd mit hellem Klang vum Himmel uff de Weihnachtsmakt gleiten

sollschd goldich glänzen un hosianna singen
un mit vill Gefiehl de Leit zum reichlichen Schbenden bringen

Schließlich is ball Weihnachten, do rickt ma sesommen
Losst all die Kindlein zu sich kommen.
Gibt hie fünf € un zehn beim Hilfswerk donn
do brauch ma ach kän schlecht Gewissen se honn.

Oh kläna Engel
Du ama Deiwel
Dem gonzen Dreiwen luhschd du zu
Schiddelschd de Kopp, findschd ga kän Ruh.
Denkschd, * die gonz Welt is jo vaschdehrt
Wissen die Leit nimme watt sich gehehrt ? *
Ma soll iwwat gonze Johr sesommenstehn
Onnstatt imma allän seinen Wäch se gehen
Ma soll sich gejenseitig helfen in da Not
Un nit nur wennet Krischkinnjen mim Finga droht.
Kleina Engel
So woret schunn imma
Kaum brennen de Kerzen un schillat da Glimma,
do genn se all seelich un honn sich gär
un machen als wenn sunschd nie eppes wär.
Immahin 4 Wuchen dauert die Zeit
Alles is harmonisch, käna hat Schdreid.
Erschd on Heilich owent gift et nomoll Reiberei

Awwa dovor is donnt Krischkinnjen zustänich, weil : du haschd donn frei.