Ehrlich währt am längsten (Reiner Thielen)

Ehrlich währt am längsten

von Reiner Thielen

 

Wie mir honn unsa Haus erricht, do war es fa uns eisern Pflicht,

do unn dort was uffzeraffe unn donn zur Baustell hemmzeschaffe.

Mei Vadda saad emol zu mir: „Ich breicht zwei starge Bohle hier.

Ich honn gesien unn duhn mich freie, do om Fransiska duhn e paar leie.“

Iwwas Wochenend hart ich debei es Bussje fun da Strosemeischdarei.

Domit fahr ich hinn om Somschdamorje unn mach ma garnit groß erscht Sorje.

Es war jo aach so scheenes Wedda, doch liee dort kenn Bohle, nur gonz dinne Bredda.

Wie ich do um de Egge bie, ich ball do die Grasgriene grie:

Do stedd beim gonze Matreal, ei mir war das aach jo gonz egal,

e PKW mit Hänger klein unn do zwei Männer lade ein

Stän, die ma braucht so in da Rinne. Doch ich glab schunn ball ich spinne.

Wie die mich nämlich honn gesehn, die Stän gleich in die onna Richtung gehn.

Der äne donn zum onna spricht: „Ich honns gesaad, ma werrn erwischt.“

Do saan ich: „Ja mei Polier, der hie jetzt baut, saad zu mir: Fahr mol hin, dort wird geklaut.“ „

Mein Herr, zeie Sie uns jetzt gleich oon?“ so dutt der onna mich gleich froon.

„Ach was, Ihr loßt die Stän jo do unn ich dröhn Eich aach gar nix no.

Iwrichens, do unne om Wech leie e paar alde unn die sinn noch gonz gudd erhalde.“

„Honn Sie nix degeje, wenn mir uns die holle, mir breichde die dringend“, saad do der Dolle.

Ich honn nix degeje, wie solid ichs aach honn, so honn ich gedenkt, nur wollt ich nix soon.

Uff emol do glab ich, ich war schunn besuff, do macht doch der Depp glatt sei Geldbeidel uff,

gebt mir fuffzich Mark unn saad donn zu mir: „Do, duhn äna trinke un e Gruß on de Polier.“

Ich honn mich verabschied, als wenn garnix war. Ei die fuffzich Mark, die holl ich doch gär.

Wie ich donn bin hemmkumm, de Babbe schunn guggt, ich merges jo gleich, es hadd ne gejuggt.

„Hascht Du die zwei Bohle? Ich siehn do nix leie.“

„Mach nur emol longsom. Du werscht Dich gleich freie.

Dei Bohle wäre schunn alt unn gonz schwarz. Doch honn ich do gleich gritt e gudder Ersatz.“

Ich genn em Babbe de Fuffzicha unn wie er so guggt, do hadds mich vor Lache doch wirklich gejuggt.

„Die honn ich dort gridd vun me Monn, so me brave.

Der mennt, mir solide die Bohle uns kaafe.

Dovun die Moral jetzt, so klar wie schwarz Wix:

Ehrlich währt am längsten unn wer nix klaut, kummt zu nix .

 

Wenn Dir das Mitmach-Portal:   SAARLÄNDISCHE DORFZEITUNG  und Ihre Inhalte gefallen,  dann mach doch einfach mit.

Sende Deinen Beitrag oder Fotos an : e-mail@saarlaendische-dorfzeitung.de

 

 

 

Wenn Dir die Dorfzeitung gefällt, teile diesen Beitrag